Joscelin 的傳記

孤鴻淚苦過廿四味

原載於1994年6月15日《東周刊》

*****

「過去是另一個世界，彷彿和我沒有甚麼關係。」

要黃子華講自己的童年事，他像訴說別人的故事般語氣平淡，很難相信他是精力

充沛的年輕人。

儘管黃子華在舞台上談笑風生；然而少年子華的煩惱，曾令他一度陷於迷糊、空

白、無助中，當然也少不了一些追錯女仔的小插曲；然後，人長大了，這個被黃

子華稱為「醜態百出」的童年便從此飛逝。

黃子華出生於一個中等家庭，小時候父母離異，母再婚，嫁給商人，但生父做甚

麼工作，黃子華也不清楚。

「淨係知道佢（生父）同七十年代的四大探長好老友，當佢看到電影講四大探

長，就媽媽聲拍枱鬧：「亂咁作！』」黃子華說。

黃子華有很多同父及異父的兄弟姊妹。他自小就要輾轉轉換居住環境，曾和父

親、母親、外婆、祖母居住。問他家境複雜嗎？

他若無其事的說：「也不是很複雜，好多人複雜過我。」

孩子的性格和思想，很多時受成長的環境影響。黃子華有過坎坷的童年，也許連

帶影響他搞「棟篤笑」表演時，仍然笑中有淚！

「我在母系兄弟姊妹中排行最大，除了一個細妹外，其他弟妹的年紀都同我相差

好遠，我同佢哋冇乜溝通。基本上，我同乜嘢人都冇乜溝通。」孤獨的童年並不

好過，但黃子華今日說來，一臉輕鬆自若；人是長大了，過去真的過去了嗎？

既逃學又高買 .........

「我嘅童年唔算幸福，有好多唔開心嘅事，想設法忘記。細路仔嘅歲月冇乜值得

驕傲，由小學四年級至中一，做過 d 乜？我完全唔記得……好似有一次考試考到

第五名，咁大個仔最叻果次。至於果陣嘅家庭同身處嘅世界係點？而家諗番仍然

一片空白，都幾得人驚。」

在空白的童年裏，黃子華印象最深刻的，要算小學三年級時的一次逃學。

「果次足足逃咗一個禮拜學。第一日係因為未做好功課，逃學時嘅感覺好古怪，

我搭校車返到學校門口，睇住 d 同學返學校，我突然覺得可能我今日可以唔駛

入去，於是我經過學校，果日就無返學。當你逃咗第一日學，你就會諗第二日點

返學呢？」

結果，黃子華一不做二不休，做了七天逃學威龍，天天獨個兒在籃球場流連，入

牛奶公司（那時候是超級市場）偷糖食，到模型玩具店偷玩具。

「其中有一日最得人驚，我偷咗本簿，一轉彎就俾 d 職員捉住，佢哋懷疑我偷

嘢，要搜我個書包，好彩果日我淨係偷咗一本簿，無偷其他嘢，佢哋唔知道果一

本簿係偷返嚟，但係已經嚇到我唔敢再偷。」

「有一次，後父發現我偷返嚟 d 嘢，佢問我 d 嘢點得嚟，我話喺街口有人叫我

幫佢帶白粉，然後俾錢我買嘅。我一講完即刻俾佢『揪』，雖然摑咗三巴掌，

但係我仍然好記得，後父將我成個人揪起跟住摑咗我一巴掌，再將我丟落梳化，

又揪起再摑，總共摑咗三巴掌，耳仔都差唔多俾佢摑聾。但係我細個覺得好Valid

（真實），因為我呃後父嘅藉口，都係喺少年時代睇嘅戲中出現過，就係『細路

俾壞人呃』。」孩童時候的黃子華，小小腦袋裏，盡是古怪念頭。

活於白色恐怖中 .........

即使是逃學偷東西，當年的黃子華卻有一套理念：「我一個人夠膽做，成班人一

齊，我就唔會做，我唔可以忍受 d 人唔道德，一個人做就冇人知，而且我覺得

同樣係偷，我偷嘢嘅心理唔同，我偷唔係因為貪心，係因為我鍾意偷；你偷係因

為貪心，係Cheap（廉價）嘅偷。」

除了逃學事件特別難忘外，黃子華回想從前，只有零碎的片段，盡是不愉快的回

憶。

「我阿婆好憎我，阿公亦唔鍾意我。我果陣得幾毫子零用錢一日，每次屋企人俾

錢我交學費，阿婆就鬧我，我哋住二樓，鬧到六樓都聽到。

「我記得有個舅父捉我埋牆，用牆身猛磨我嘅背脊……又有一個舅父喺碌架床上

面撲過去打另一個舅父。

「我做錯咗嘢，阿婆話：『我一陣間先打你。』果種白色恐怖好得人驚……。

「有一個曾經做過警察嘅老師，用圓規打我手背，嚇到我喊……又有一個阿Sir，

喺教員室入面劈劈啪啪打到我碌地，都冇人出聲……同學嘅家長投訴我，話我教

佢個仔講粗口……屋企人成日鬧交，我好驚大人鬧交，直至而家，都好驚見到人

嗌交。」從前，一幅幅畫面浮現眼前，黃子華回想已刻意淡忘的過去，不知不覺

間又陷入了回憶的深淵，不能自拔，一剎那間彷彿忘了自己正在接受訪問。

誤中副車改情歌 ..........

在家得不到愛護，學校裏又沒有人憐惜，小小的黃子華日夕生活在缺乏安全感的

陰影中。

黃子華說：「我細個好想長大，長大後可以控制 d 嘢……我諗只要我長大有錢，

就可以解決所有問題。」

和其他小孩子一樣，除了家庭和學業的問題，便是愛情的煩惱了。少年十五二十

時，黃子華在童年時代裏，劃出一個「追女仔時期」，連貫了整個中學，以至大

學歲月。

最尷尬的還是黃子華竟然追錯女仔，他說：「我細個好鍾意一個女仔，佢好靚，

我彈結他想作首歌送俾佢，但始終同佢做唔成朋友，唔知點樣竟然識到佢隔籬

果個女仔，呢個女仔同佢嘅質素相差好遠，但係唔理啦，咁大個仔都未識過女

仔，情歌都作埋，改過情歌入面嘅女仔名咪得囉！」

當然，馳騁情場，有得意、也有失意。黃子華也不例外，曾經有一個女孩，對他

若即若離；當黃子華唸完中五到加拿大升學時，便狠下心放棄這個女孩，最妙是

第二年，黃子華回港度暑假，該女孩竟不知道他曾經離開過。

大學時期的黃子華，甚至為情自殺，服食了一整瓶敏感藥，但死不去，經過這

次，又不喜歡這個教他生死相許的女朋友了。

孤單無助陰影未消 ..........

不過，對黃子華人生影響最大的，不是家庭，亦非愛情，竟然是宗教！

「果陣知道有靚女喺教會入面，唔係因為你想識果 d 靚女而入教，而係你覺得

教會係一個美麗嘅地方，因為呢 d 女仔，令佢更美麗，少年人都有一種追求美

麗的傾向。」

到了加拿大，黃子華當起宗教領袖來，也因為更熱切的追尋，令他脫離基督

教。

「當時我租咗一個地牢住，果個地牢好似山洞，一個個窗仔，鋪滿白雪，我連續

七日唔返教會，唔祈禱咁睇完本《卡拉馬佐夫兄弟們》（The Brothers

Karamazor，俄國文學作品）然後行出地洞，話『我唔信啦』（宗教），種感

覺好有哲學家尼采嘅超人意識。

「我係基督徒果陣，覺得宗教係真理，可以拯救人；後來發覺如果人唔能夠救到

自己，你都要接受，咁就冇嘢可以救到你。」一派悲觀的思想，踏碎了世人寄予

宗教的厚望。

黃子華歸咎這與他的童年有關，他說：「我咁坎坷o既童年，有乜辦法對未來有

美好嘅幻想？即使我嘅童年唔坎坷，我都唔能夠話呢個世界美麗，因為呢個世界

根本唔美麗。」

對於童年留下的孤單無助陰影，長大了的黃子華依然無法消除，「我今日仍然覺

得做人好無助，好多事唔知點樣解決；如果有人覺得自己快樂，係佢嘅幸

運。」

現在黃子華不再追求開心快樂，他要的是滿足，「但有時滿足不一定開心，可能

是種苦澀的滿足感。」黃子華說。